anson bb @ 初五

嚟到初五 anson同我地都已經悶悶地, 決定落街行行

我地去咗對面的公園行, 途中anson戰戰兢兢, 冇咩表情

就算爺爺同佢玩都冇咩反應

anson: 可能太陽伯伯出咗嚟暖粒粒, 睡魔uncle又嚟搵我啦

行咗一陣去咗附近的商場食野, 連anson bb都要食

間樣個tea set好鬼抵食, 一個碗仔翅(好大碗) 加兩個小食連野飲都只係$17

而且食物質素都算ok, 值得推介 (卓爾居 ~ 小城知味)

返到屋企樓下anson已經冇咗知覺

anson bb @初二 ~ 初四

初一之後我地都冇出街拜年, 只有留係屋企同anson bb玩

初二的一早爺爺就整好髮菜豪豉豬骨粥帶過嚟俾我地食

跟住大家就同anson玩啦.....或者應該係我俾anson玩先真

基本上係男人抱親anson都係失敗收場, 包括我(老豆)在內....

反而anson對女士門就無任歡迎, 無論見過還是未見過的女士門

anson都冇咩反抗..............重色輕老豆


係新年期間anson日玩夜玩 (同時間都係日扭夜扭)

初四契媽同anson拜年年, anson為咗多謝契媽, 即場表現嘔奶

anson仲開始同史力仔做friend ( friend 咗3分鐘咁多多)

又開始玩契媽送俾佢的巨形玩具,

anson仲玩得十分豪邁 (即係十分粗魯)

5分鐘大戰過後, 巨形玩具慘敗, 俾anson踢開咗,

而anson仍精力旺盛, 轉戰枕頭......結果俾我抱開咗

因為anson出口術, 咬我個枕頭

初三我同老婆係屋企打邊爐, 用咗小肥羊湯包, 都唔差喎

同係出面食都有7~8成似 , 而d牛肉係吉之島買, 下面個兩盒咁靚的

牛肉加埋都係$60左右, so good

初四個日老婆細佬聽到我地話正, 一於encore再嚟多round

佢仲買咗盒$78得8超薄片的和牛, 不過一分錢一分貨, 真係唔同食法

anson bb @ 大年初一

大年初一, anson仲係婆婆屋企, 當然要逗吓婆婆利是先啦

跟住差唔多去到夜晚就出發去酒樓同D親朋戚友拜年啦

路途都幾遠架, 要由東涌去到北角.ANSON仲第一次坐地鐵添

不過BB始終係BB, 食完奶奶之後幾好奇都冇用, 要訓番一陣

去到酒樓ANSON就眼仔碌碌囉, 不過由於酒樓迫到爆, 冇得申展一下,

ANSON BB 都有D不耐煩

最後都食到成10點先走, 巴士上的座位係世上最好的床玉, ANSON BB

當然唔放過訓個靚覺的機會啦! 最後一站就係anson日後的屋企, 係巴士

訓飽咗的關係, 初一的anson bb 成12點半先訓

恭喜發財

Anson仔同各位個拜年先~

媽咪年初二至初五會帶我返屋企,
各位有興趣可以來探我嫁~~

食蘋果蓉

婆婆日日都比少少糊仔比Anson食既有時又比番薯.

媽咪夜晚食蘋果磨左D蘋果蓉比我食添!!

今次係我第一次食蘋果蓉,真係好好咪呢(我仲食到嗒嗒聲添)

唔信??你地睇下 :



我食完蘋果蓉(其實食乜都係),無得再食,

我就會係到罵人嫁啦!!連媽咪同婆婆都話我麻煩呢~

Anson第一次去酒樓

婆婆屋企今年選左去酒樓食飯做節!

雖然婆婆成日都帶我去行"Taste"

但係今次係我第一次去酒樓呢~

去到酒樓前我已經訓左覺覺豬,15mins後我就醒左啦!

我見到所有既事物都好好奇!係之前未見過既...

見到個個都有野食,我又咀郁郁...但係又無得食,好慘!!

媽咪仲講左個壞消息比我知,就係全公司既人都要減人工!

(媽咪比公司減左8%人工)

如果日後公司生意再差分分鍾比人炒添呀.

真係要諗諗計先得!!

P.S. 唔知係唔係最近天氣好返d,Anson仔既皮膚又
好左d!!不過相信新年凍返皮膚又會衰返d.

手腳鞋晒(好似魚鱗咁)

最近Anson面面甩皮唔在講,連d手手腳腳都"鞋晒"而且
仲係一達達好似d魚鱗咁(有d皮好似乾到結蕉咁,但又無流血or損)!!
已經成日同佢搽Aqeous Cream,沖涼就用浴油+ 沖涼後用bb油
都仲係好乾咁...不過手腳又無紅,面就少少部份紅,好似爆拆咁.
但d紅一陣有一陣又會無左,都唔知點解??
真係好煩呀!!d皮膚幾時先好嫁...
(見Anson成日拆面面,唔知佢係唔係好痕,又"r"到損晒)

 免費片片
Pampers--用5個好動寶寶尿片吉包換既
Huggies--上網登記後Fax BB資料送既(不過好多mama都fax唔到,所以都覺得自己好好彩)

我屋企人買左d新家俬,當然仲要買返部新電視啦!
我老豆就睇中左Sharp既46吋內置高清TV
咁吉之島又有平 (有自選組合每個組合選1款)
(選3樣既都係$18888)係東涌食完飯就殺入去屯門吉之島買野啦!!
我屋企人選左 : ( 其實第1,2款就多d野選,反而第3款d野就無謂d)
1)Sharp46吋全高清內置解碼電視
2)太平洋易拆式抽油煙機 ( 白色 )
(由於我屋企無抽油煙機,所以我屋企人比個抽油煙機我地!!)
3)寶康達快速智能煲

Anson就好啦!!23/1就有46吋TV睇...唔知佢回來睇返42吋TV
會唔會話太細睇唔慣呢??

見Anson新年會回家就去Best電器到買左個"威馬"暖風機($788)
有好多功能嫁!

1)放濕氣
2)暖風 or 熱風
3)負離子

表妹結婚@陽明山莊

幾個月之前收到表妹張帖已經"嘩"一聲

成粒石係張帖到, 都幾咁誇吓, 不過又幾鬼靚

入面仲有張車票, 個夾又係靚到一絕

就係哩兩樣野已經另我對個婚禮好有期待

婚禮當日應主人家要求提前係7點鐘入席, 所以我同老婆6點幾就到咗

去到個時已經很多人客都已經到場, 真係有d估唔到

報置方面可以用冇嚟形容, 只係有棵願望樹特別D

雖然係表妹結婚, 但坐位有限, 我同老婆安排了同素未謀面的人坐,

本來諗住無咩所謂, 仲好~~唔駛應酬, 點知個班素未謀面的人原來都

係親戚, 都冇所謂啦! 都係食完就走架啦! 點知同抬的一個畫家無啦啦

講起耶穌上嚟, 另一位長背級的親戚(某性錢明星個老豆)

就九吾答八咁講之孚者也地回應, 我當然無理會啦

點知好衰唔衰, 我竟然同個位親戚眼神上有所接觸,


就係咁無啦啦俾佢話我要多d孝順喎, 我"哦"一聲就再無望佢繼續食野

好彩其他親戚都幫手解圍, 佢先無再對住我講, 目標轉番去畫家身上

再講番個婚禮

婚禮開始並唔係新人進場, 而係鋼琴演奏, 話個表演者唔知咩鬼冠軍喎

對我D庶民嚟講, 真係唔多識欣賞, 加上鋼琴並唔係個台上,

只係靠電視睇到.............表演者D頭髮,

唯有坐係到對住個MENU幻想一下D餸菜有幾美味,

幻想到美點雙輝之後佢都仲未彈完, 無聊得很,

再東張四望, 發覺大部份人都垂下頭來似作陶醉

但相信係紛紛欲睡似D
, 長達近10分鐘的演奏之後

大家熱烈股掌, 因為終於到新人進場 (又或者終於彈完, 心裡叫好)

餸菜方面有好有唔好啦,  一開始係乳豬 , 基本上係終極殘廢餐,

唔知係邊個角落分完先拎出嚟, 完全無機會見到隻全豬!

乳豬皮 ~ 相當堅硬
, 但因為肚餓都俾面食咗兩件

之後都冇咩特別差啦, 個魚翅我就比佢NO.1啦

話名係紅燒大排翅, 事實上都係一排排的翅, 不過係無翅針,

只有翅邊, 原本都幾失望, 不過由於翅多過湯的關係, 食落都唔錯

之於小老婆期待的美點雙輝, 佢就好失望啦! 因為只係得d傳統的糕餅

今次婚禮anson冇去, 不過個blog點可以冇佢份啊

Anson依家識除手套,睇少一陣就用手爪面...變左花面貓!!

睇下下次有無機會拍底Anson叫食"濛濛" or mama既片段比大家睇.